မြန်မာ-ထိုင်း နယ်စပ်စည်းခြား သောင်ရင်းမြစ်တွင် ထိုင်းနိုင်ငံဘက်မှ မြစ်ရေစပ်ထိချ၍ ကမ်းထိန်းနံရံ တည်ဆောက်နေမှုအား မြန်မာနိုင်ငံ မြ၀တီဘက်မှ တပ်၊ ရဲ၊ BGF၊ အုပ်ချုပ်ရေးမှ တာဝန်ရှိသူများ ပါဝင်သော အဖွဲ့စုံသည် မတ်၂၄ ရက် ညနေက ကန့်ကွက် တားမြစ်ခဲ့ကြောင်း သိရသည်။
မြ၀တီမြို့ အမှတ်(၅)ရပ်ကွက် (၁၀) ဂိတ် တစ်ဖက်ကမ်း သောင်ရင်းမြစ်ချောင်းအတွင်း ရေစပ်တွင် ထိုင်းနိုင်ငံဘက်မှ မြေတူးစက်ဖြင့် လမ်းချဲ့ကာ ကျောက်ကြီးများချပြီး ကမ်းနံရံ တည်ဆောက်နေခြင်း ဖြစ်သည်။
"မနေ့ကစလုပ်နေတာပါ။ မြေတူးစက်နဲ့ချဲ့ပြီး ကျောက်ကားသုံးစီးနဲ့ လာချပါတယ်။ ကားသွားလောက်တဲ့ အကျယ်ပြုလုပ်နေတာပါ။ လုပ်မယ်ဆိုလည်း နှစ်နိုင်ငံသဘောတူညီချက်ရမှ လုပ်သင့်ပါတယ်"ဟု မြ၀တီဘက်ကမ်း ၁၀ ဂိတ်တွင် နေထိုင်သည့် မျက်မြင်တွေ့ရှိသူ တစ်ဦးက ပြောကြားသည်။
ပြီးခဲ့သည့် နှစ်နိုင်ငံနယ်ခြားကော်မတီ BLO အစည်းအဝေးတွင် ထိုင်းနိုင်ငံဘက်မှ တင်ပြသော ကမ်းထိန်းနံရံ တည်ဆောက်မည့် အစီအစဉ်အား ကန့်ကွက်ခဲ့ပြီး နှစ်ဖက်ညှိနှိုင်းရန် တင်ပြသော်လည်း မတ် ၂၃ ရက်မှ စတင်လုပ်ဆောင်လာသည့်အတွက် တားမြစ်ရခြင်းဖြစ်သည်ဟု မြ၀တီမြို့နယ် ရဲတပ်ဖွဲ့မှူးက ပြောကြားသည်။
“ထိုင်းဘက်က ဖိတ်ခေါ်ပြသခဲ့တာကို ကန့်ကွက်ခဲ့ပေမယ့် ဘက်ဂျက်မကုန်မီ လုပ်ဆောင်လာတဲ့အတွက် အခုလို လာတားရတာပါ။ မြန်မာနိုင်ငံ တာဝန်ရှိသူအဆင့်ဆင့်ကို တင်ပြသွားမှာဖြစ်သလို ထိုင်းဘက်ကိုလည်း တရားဝင် ကန့်ကွက်သွားမှာပါ”ဟု မြ၀တီမြို့နယ်ရဲတပ်ဖွဲ့မှူးက ပြောကြားသည်။
၂၀၁၀ ပြည့်နှစ်က ထိုင်းနိုင်ငံဘက်မှ ကမ်းထိန်းနံရံ တည်ဆောက်မှုကြောင့် ရေစီးပြောင်းလဲကာ မြန်မာနိုင်ငံ မြ၀တီမြို့ သံတံတားအနီးတစ်ဝိုက်မှ ကမ်းစပ်နှုတ်ခမ်းသားများ ပဲ့ကြွေကာ မြန်မာ့မြေပိုင်နက်များ ဆုံးရှုံးခဲ့သည်။
ထို့အတူ ထိုင်းဘက်မှ ဖွင့်လှစ်သော နယ်စပ်ဖြတ်ကျော် ကုန်ပစ္စည်းသယ်ယူ တင်သွင်းသည့်ဂိတ်များတွင် မြေဖို့ခြင်း၊ မြေချဲ့ခြင်းများ လုပ်ဆောင်ခဲ့ခြင်းကြောင့် ရေကြောင်း ပြောင်းလဲလျက်ရှိသည်။
ယင်းသို့ မြန်မာ့မြေပိုင်နက်များ ဆုံးရှုံးခြင်းကြောင့် နှစ်နိုင်ငံ ညှိနှိုင်းမှုဖြင့် နယ်စပ်စည်းနှင့် ထိစပ်နေသော ကမ်းစပ်တစ်လျှောက်တွင် ကုမ္ပဏီလေးခုက ကမ်းထိန်းနံရံ တည်ဆောက်ခဲ့သော်လည်း များစွာကျန်နေသေးကြောင်း သိရသည်။
Friday, March 25, 2016
နှစ်နိုင်ငံ နယ်စပ်စည်းခြား သောင်ရင်းမြစ်ကြောင်း ပြောင်းလဲနိုင်သည့် မြေထိန်းနံရံ ထိုင်းဘက်ကမ်းမှ ပြုလုပ်နေမှု မြန်မာဘက်မှ ကန့်ကွက်
Subscribe to:
Post Comments (Atom)
0 comments:
Post a Comment