တရားမဝင် သတ္တုတူးဖော်ရေးလုပ်ငန်းများ စစ်ကိုင်းတိုင်းနှင့် ရှမ်းပြည်နယ်၌ အများဆုံးဟုဆို

သတ္တုတူးဖော်ခြင်းလုပ်ငန်းများတွင် တရားဝင်နှင့် တရားမဝင် လုပ်ကိုင်မှုများ ရောနှောနေပြီး စစ်ကိုင်းတိုင်းဒေသကြီးနှင့် ရှမ်းပြည်နယ်တို့တွင် တရားမဝင် သတ္တုတူးဖော်ရေးလုပ်ငန်းများကို အများဆုံး လုပ်ကိုင်နေကြောင်း သတ္တုတွင်းကဏ္ဍဆိုင်ရာ ကျောက်မီးသွေးမိုင်းများသို့ ကနဦး ပူးပေါင်း ကွင်းဆင်းလေ့လာဆန်းစစ်ခြင်းနှင့် လူမှုကြားနာပွဲပြီးမြောက်ကြောင်း အစီရင်ခံစာတွင် ဖော်ပြထားသည်။


စိမ်းလန်းအမိမြေ ဖွံ့ဖြိုးတိုးတက်ရေးအသင်းအနေနှင့် သတ္တုတွင်းလုပ်ငန်းများ တရားဝင်ဟုတ် မဟုတ် စစ်ဆေးရာတွင် သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာန၏ အချက်အလက်များနှင့် တိုက်ဆိုင်စစ်ဆေးကြောင်း၊ အစိုးရသစ်အနေနှင့် ယင်းဒေသများရှိ သတ္တုတွင်းလုပ်ငန်းများကို တရားဝင်ခြင်းရှိ မရှိ စစ်ဆေးသင့်ကြောင်း ယင်းအစီအရင်ခံပြုစုသည့် စိမ်းလန်းအမိမြေ ဖွံ့ဖြိုးတိုးတက်ရေးအသင်း ဥက္ကဋ္ဌ ဦးဝင်းမျိုးသူက ပြောကြားသည်။

“ဒါတွေက တကယ့်တရားဝင်ဟုတ် မဟုတ်ဆိုတာကို အခြားအရပ်ဘက် အဖွဲ့အစည်းတွေနဲ့ ဆက်လုပ်မယ်။ အခုစာရင်းတွေအရ တရားမဝင်တာရော၊ ဝင်တာရော Mine(သတ္တု)လုပ်ငန်းက ဧရိယာ ဟက်တာပေါင်း တစ်သောင်းကျော်ရှိတယ်။ တရားမဝင် သတ္တုမိုင်းတွေရှိတဲ့အတွက် ပတ်ဝန်းကျင် ပိုထိခိုက်တယ်” ဟု ၎င်းကဆိုသည်။

အစိုးရအနေနှင့် သတ္တုတွင်းလိုင်စင် ချထားပေးမှုကို လိုက်လံစစ်ဆေးမှုများ ပြုပြင်ရန်လိုအပ်ပြီး သတ္တုတွင်းလုပ်ငန်းများကို ပတ်ဝန်းကျင်ထိခိုက်မှု အနည်းဆုံး ဆောင်ရွက်နိုင်အောင် အသိပညာပေးမှုများ လုပ်ပေးသင့်ကြောင်း၊ လက်ရှိအချိန်တွင် သတ္တုတွင်းလုပ်ငန်း အကြီးစားများတွင်သာ EIA/SIA လုပ်ငန်းများ ဆောင်ရွက်နိုင်ပြီး လုပ်ငန်းအသေးစားများမှာ ငွေအင်အားမလိုက်နိုင်သဖြင့် EIA/SIA လုပ်ငန်းများ မဆောင်ရွက်နိုင်ကြောင်း ၎င်းကရှင်းပြသည်။

အဆိုပါအစီရင်ခံစာတွင်ပါဝင်သည့် ဒေသနှစ်ခုတွင် တရားမဝင် သတ္တုတူးဖော်ရေးလုပ်ငန်းများ လုပ်ကိုင်နေခြင်းမှာ မှန်ကန်နိုင်ကြောင်း၊ ယခင်အစိုးရလက်ထက်အဆက်ဆက်တွင် တရားမဝင် သစ်ခိုးထုတ်မှုများရှိခဲ့ပြီး ဖမ်းဆီးမှုများ ဆောင်ရွက်ခဲ့ကြောင်း၊ ယခုအချိန်တွင် အခြားသောဝန်ကြီးဌာနများနှင့်ပူးပေါင်း၍ ဖမ်းဆီးရေးများ တင်းကျပ်မည်ဖြစ်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာန ညွှန်ကြားရေးမှူး ဦးကျော်သက်က ပြောကြားသည်။

“သတ္တုတွင်းတူးတယ်ဆိုတာ လူသူအရောက်အပေါက် နည်းတဲ့နေရာဆိုတော့ ဖမ်းဆီးရေးမှာ အခက်အခဲတော့ရှိတယ်။ ဒါကြောင့် သတ္တုတွင်းနဲ့ စစ်တပ်တို့ပေါင်းပြီးတော့ ရှေ့ဆက်ဖမ်းသွားမယ်” ဟု ၎င်းကဆိုသည်။

မြန်မာတစ်နိုင်ငံလုံး အတိုင်းအတာဖြင့် လုပ်ကိုင်ခွင့်ပေးထားသော သတ္တုတွင်းလုပ်ငန်းပေါင်း ၁၈ဝဝ ကျော်ရှိကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနထံမှ သိရသည်။

Credit To >>> The Voice Weekly