ထိုင်းနိုင်ငံဆိုင်ရာ မြန်မာသံအမတ်ကြီး ဦးဝင်းမောင်ဟာ ဒီကနေ့မနက်ပိုင်းက ထိုင်းဝန်ကြီးချုပ်ရုံးကို သွားပြီး ၀န်ကြီးချုပ်ရုံး ၀န်ကြီး Pannada Diskul နဲ့ တွေ့ဆုံပြီးတော့ သေဒဏ်ချခံထားရတဲ့ မြန်မာရွှေ့ပြောင်းအလုပ်သမားနှစ်ယောက်ကိစ္စ ပြောဆိုခဲ့တယ်လို့ မြန်မာ သမ္မတရုံး ညွှန်ကြားရေးမှူးတဦးဖြစ်သူ ဦးဇော်ဌေးရဲ့ ဖေ့စ်ဘုတ်စာမျက်နှာမှာ ဖော်ပြထားပါတယ်။
ထိုင်းဝန်ကြီးချုပ်က ပြည်တွင်းခရီးစဉ်တခု သွားနေတဲ့အတွက် ၀န်ကြီးချုပ်ရုံး ၀န်ကြီးနဲ့ပဲ တွေ့ခဲ့ရတာပါ။ မြန်မာအလုပ်သမားနှစ်ဦး ရဲ့အမှုဟာ ထိုင်းနိုင်ငံ တရားဥပဒေနဲ့အညီ စစ်ဆေးစီရင်တာဖြစ်တဲ့အတွက် ထိုင်းဥပဒေ၊ ထိုင်းတရားစီရင်ရေးစနစ်ကို လေးစားရ မှာဖြစ်တဲ့အတိုင်း မြန်မာနိုင်ငံအနေနဲ့ ထိုင်းနိုင်ငံရဲ့ တရားစီရင်ရေးစနစ်ကို ၀င်ရောက်စွက်ဖက်လိုတာမျိုး မရှိတဲ့အကြောင်း၊ ဒါပေမဲ့ လည်း အမှုစစ်ဆေးတာကို စောင့်ကြည့်နေကြ တဲ့ မြန်မာတနိုင်ငံလုံး က ပြည်သူတွေရဲ့ခံစားချက်၊ နှစ်နိုင်ငံချစ်ကြည်ရင်းနှီးမှု စတဲ့ အချက်တွေကို ထောက်ထားပြီး ဒီအမှုနဲ့ပတ်သက်လို့ ထိုင်းအစိုးရအဖွဲ့ရဲ့ အခွင့်အာဏာ လုပ်ပိုင်ခွင့် အတွင်းကနေ သုံးသပ် ဆောင်ရွက်ပေး ဖို့၊ မြန်မာနိုင်ငံသားနှစ်ယောက်ဖြစ်တဲ့ မောင်ဝင်းဇော်နဲ့ မောင်ဇော်လင်းထွန်းတို့ကို ကူညီစောင့်ရှောက်ပေးရေး ၀န်ကြီးချုပ်ထံ တင်ပြပေးဖို့ သံအမတ်ကြီး က ပြောခဲ့ပါတယ်။
မြန်မာနိုင်ငံက ထိုင်းသံရုံးရှေ့မှာ ဆန္ဒပြတာတွေနဲ့ပတ်သက်ပြီး မြန်မာရောက် ထိုင်းနိုင်ငံသားတွေအတွက် စိုးရိမ်ပူပန်ကြောင်း ထိုင်းဝန်ကြီးကပြောတဲ့ အပေါ်မှာတော့ မြန်မာပြည်သူတွေဟာ အလုပ်သမားနှစ်ဦးအတွက် တရားမျှတမှုကို တောင်းဆိုနေတာ သာဖြစ်ပြီး မြန်မာရောက် ထိုင်းနိုင်ငံသားတွေကို ဒုက္ခပေးတာမျိုး၊ နှစ်နိုင်ငံချစ်ကြည်ရေးနဲ့ ဆက်ဆံရေးကို ထိခိုက်စေမယ့် လုပ် ဆောင်ချက်မျိုးတွေ လုပ်မှာ မဟုတ်ဘူးဆိုတာ မြန်မာ သံအမတ်ကြီးက ပြန်ပြောခဲ့ပါတယ်။
မြန်မာနိုင်ငံသားတွေအတွက် ဥပဒေရဲ့ မျှတတဲ့ ဆင်ခြင်သုံးသပ်နိုင်မှုကို ရဖို့အတွက် မြန်မာ အစိုးရအနေနဲ့ လုပ်လို့ရတာမှန်သမျှ၊ လုပ်နိုင်စွမ်းရှိတာ မှန်သမျှ ဆောင်ရွက်သွားမယ်လို့လည်း ဦးဇော်ဌေးက သူ့ရဲ့ဖေ့စ်ဘုတ်မှာ ရေးထားပါတယ်။
ထိုင်းနိုင်ငံ၊ ကော့တောင်ကျွန်း ခေါ် လိပ်ကျွန်းမှာ ဗြိတိန်ကမ္ဘာလှည့်ခရီးသည်နှစ်ဦးကို သတ်ခဲ့တယ်ဆိုတဲ့ စွဲချက်နဲ့ မြန်မာနိုင်ငံသား ရွှေ့ပြောင်း အလုပ်သမားနှစ်ယောက် ကို ကော့စမွေခရိုင် ထိုင်းတရားရုံးက သေဒဏ်ချ ထားတဲ့အပေါ် ကန့်ကွက်တဲ့အနေနဲ့ လူ ၅၀၀ နီးပါးဟာ ရန်ကုန်မြို့က ထိုင်းသံရုံးရှေ့မှာ ဒီကနေ့ စုဝေးဆန္ဒပြကြပါတယ်။
ဒီအမှုကိစ္စကို ထိုင်းဘုရင်ကြီးကိုယ်တိုင် ၀င်ရောက် ဆောင်ရွက်ပေးဖို့ ဆန္ဒပြသူတချို့ က တောင်းဆိုပြီး သေဒဏ်ချခံရသူနှစ်ဦးမှာ အပြစ်မရှိဘူးလို့ အခိုင်အမာ ပြောကြပါတယ်။
ထိုင်းနိုင်ငံ အပန်းဖြေနေရာတခုဖြစ်တဲ့ လိပ်ကျွန်းမှာ ဗြိတိန်နိုင်ငံသား ကမ္ဘာလှည့် ခရီးသည်နှစ်ဦးကို ပြီးခဲ့တဲ့နှစ်က သတ်ခဲ့တယ် ဆိုပြီး အသက် ၂၂ အရွယ်တွေဖြစ်ကြ တဲ့ မောင်ဝင်းဇော်နဲ့ မောင်ဇော်လင်းထွန်းတို့ကို မနေ့ကပဲ သေဒဏ်ချလိုက်တာပါ။
အသက် ၂၄ နှစ်အရွယ် David Miller နဲ့ အသက် ၂၃ နှစ်အရွယ် Hannah Witheridge တို့ကို သူတို့မသတ်ဘူးလို့ မြန်မာအလုပ် သမားနှစ်ယောက်လုံး က ငြင်းခဲ့ပါတယ်။ သေဒဏ် ချမှတ်ခံရတဲ့အပေါ် အယူခံဝင်သွားမယ်လို့ သူတို့ရဲ့ရှေ့နေက ပြောထားပါတယ်။
Credit To >>> ပြည်မြန်မာ News
Myanmar Kyat Exchange Rate
0 comments:
Post a Comment