ဝမ်ဟိုင်းဒေသတွင် တပ်မတော်နှင့် SSPP/SSA အကြား တိုက်ပွဲများပြင်းထန်နေသောကြောင့် ဒေသခံများ ကြောက်လန့်တကြား ထွက်ပြေးနေကြရ

ရှမ်းပြည်တိုးတက်ရေးပါတီ SSPP/SSA ၏ ၀မ်ဟိုင်းဌာနချုပ်တွင် အောက်တိုဘာ ၁၀ ရက် နံနက်ပိုင်းတွင် တိုက်ပွဲများပြင်းထန်ပြီး  လေယာဉ်နှစ်စင်းဖြင့် ဗုံးကြဲကာ၊ ဒုံးကျည်များဖြင့် ပစ်ခတ်တိုက်ခိုက်သဖြင့် ဒေသခံများ ကြောက်လန့်တကြား ထွက်ပြေးနေရကြောင်း ၀မ်ဟိုင်းဒေသခံများက ပြောကြားသည်။
အောက်တိုဘာ ၉ ရက် ညဘက်အချိန်  ကျေးသီးမြို့နယ် မိုင်းနောင်မြို့နယ်ခွဲဘက်တွင် SSPP ဘက်မှ ပစ်ခတ်သဖြင့် တပ်မတော်အရာရှိတစ်ယောက် ကျဆုံးသည်ဟုဆိုကာ အောက်တိုဘာ ၁၀ ရက် နံနက်တွင် တပ်မတော်ဘက်မှ တိုက်ခိုက်ခြင်းဖြစ်ကြောင်း  SSPP/SSA မှ ပြောခွင့်ရပုဂ္ဂိုလ် ဗိုလ်မှူးကြီးစိုင်းလ က ပြောကြားသည်။

အောက်တိုဘာ ၁၀ ရက် နံနက် ၆ နာရီ တွင် လက်နက်ကြီးများဖြင့် ပစ်ခတ်မှုများကြောင့် ၀မ်ဟိုင်းဘုန်းကြီးကျောင်း ဆွမ်းစားဆောင်ကို ထိမှန်ခဲ့ပြီး ဆိုင်ကယ်တစ်စီး မီးလောင်ပျက်စီးသွားကြောင်း၊ စစ်ဘေးရှောင်များနှင့်  သံဃာတော်များမှာ နံနက်အစောပိုင်း လက်နက်ကြီးများ ပစ်နေစဉ်ကတည်းက ရှောင်ရှားထွက်ပြေးခဲ့ကြောင်း၊ လူထိခိုက်မှုမရှိကြောင်း ဒေသခံများက ပြောကြားသည်။

“မနေ့ညက မိုင်းနောင်ဘက်မှာ ဒီဖက်က သွားတိုက်တယ်လို့ဆိုပြီး ဒီနေ့ နံနက် လက်နက်ကြီးနဲ့ပစ်တယ်။ လေယာဉ်နှစ်စင်းနဲ့ ဗုံးလာကြဲတယ်။ ညက ပစ်ခတ်ပြီးတော့ မနက်ရောက်တော့ လေယာဉ်နဲ့လည်း ဗုံးကြဲတာရှိတယ်။ သူတို့အရာရှိတစ်ယောက် ကျတယ်ဆိုပြီး ဒီမနက် ၆ နာရီက ကျူမခေါင်စခန်းကို လက်နက်ကြီးနဲ့ပစ်တာ။ စခန်းကနေ ၀မ်ဟိုင်းထဲကို လက်နက်ကြီးနဲ့ ပစ်တယ်။ အားလုံး ၁၀ လုံးကျော်ပစ်တယ်။ ၁၀ နာရီ ၁၅ မိနစ်မှာ တိုက်လေယာဉ်ရော၊ ရဟတ်ယာဉ်နှစ်စီးရော လာပြီး ဗုံးကြဲတယ်။ စစ်ဘေးရှောင်တွေနဲ့ သံဃာတော်တွေက မနက်ထဲက ရှောင်နေတယ်လေ” ဟု SSPP တပ်ဖွဲ့မှ ပြောခွင့်ရ ဗိုလ်မှူးကြီးစိုင်းလက ပြောကြားသည်။

“မနေ့ညတုန်းက လက်နက်ကြီးတွေနဲ့ လာပစ်လို့ ဆိုင်ကယ်တစ်စီး ပျက်စီးသွားတယ်။ လူတွေလည်း မနေရဲတော့ဘူး။ ထွက်ပြေးကုန်ကြပြီလေ။ ခု ဘယ်သူမှမရှိတော့ဘူး။ ဒေသခံတွေ ၀မ်ဟိုင်းအရပ်သားတွေ မရှိတော့ဘူး။ နံနက် ၆ နာရီကနေ စပြီးတော့ လက်နက်ကြီးတွေ အလုံး ၂၀ လောက် ရှိမယ်ထင်တယ်။ ထု နေတာ။ မနက်အစောကြီးတည်းက ထုထဲက လူတွေ ထွက်ပြေးနေကြပြီ။ ခုတော့ ဘယ်သူမှ မရှိတော့ဘူး။ အဲဒီမှာက ၀မ်ဟိုင်းမှာ ဒုက္ခသည်တွေပဲ နေတာလေ။ နေ့လယ် ၁၀ နာရီ ကျော်ကျော်မှာ လေယာဉ်ပျံတွေနဲ့လာပြီး ဗုံးကြဲသေးတယ်။ ကျွန်မတို့ ထွက်ပြေးနေချိန်မှာပေါ့” ဟု ၀မ်ဟိုင်းဒေသခံစစ်ဘေးရှောင် ထွက်ပြေးနေသော နန်းကြာဖူးက ပြောကြားသည်။

Credit To >>> Eleven Media Group