Friday, October 9, 2015

အထွေထွေ ရွေးကောက်ပွဲ နီးကပ်လာသည့်အတွက် တိုက်ပွဲများကြောင့် အနှောင့်အယှက် အဟန့်အတား မဖြစ်စေရန် အလွန်အရေးကြီးဟု SSPP ထုတ်ပြန်

Friday, October 09, 2015    No comments

ယခုအခါတွင် တစ်နိုင်ငံလုံး အပစ်အခတ် ရပ်စဲရေး သဘောတူစာချုပ် (NCA) ကို လက်မှတ်ရေးထိုးရန် အချိန်နီးကပ်နေသည့်အတွက် လည်းကောင်း အထွေထွေ ရွေးကောက်ပွဲကြီးသည်လည်း နီးကပ်လာသည် ဖြစ်သည့်အတွက် မလိုလားအပ်သည့် တိုက်ပွဲများကြောင့် အနှောင့်အယှက် အဟန့်အတားများ မဖြစ်စေရန် အလွန်အရေးကြီးသည့် အချိန်အခါ ဖြစ်သည်ဟု တိုင်းရင်းသားလက်နက်ကိုင် အဖွဲ့တစ်ခုဖြစ်သည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) က အောက်တိုဘာ ၈ ရက်တွင် သဘောထား ထုတ်ပြန်ခဲ့သည်။
လက်ရှိ SSPP/SSA နယ်မြေအတွင်း တိုက်ပွဲများ ဖြစ်ပွားမှုအပေါ် ထုတ်ပြန်ချက်ကို ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) ၏ Facebook စာမျက်နှာတွင် အောက်တိုဘာ ၈ ရက်က ဖော်ပြခဲ့ခြင်းဖြစ်ပြီး အဆိုပါ ထုတ်ပြန်ချက်တွင် အစိုးရတပ်မတော်နှင့် SSPP/SSA တို့အကြား အောက်တိုဘာ ၅ ရက်၊ ၆ ရက်နှင့် ၇ ရက်များတွင် တိုက်ပွဲဖြစ်ပွားမှုများနှင့် ပတ်သက်ပြီး ရက်အလိုက် ရေးသားဖော်ပြထားသည်။

အဆိုပါ တိုက်ပွဲများ ဖြစ်ပွားရခြင်းသည် အစိုးရ တပ်မတော်ဘက်မှ အင်အားအလုံးအရင်းဖြင့် ထိုးစစ်ဆင်လာခြင်းဖြစ်ကြောင်း SSPP/SSA ၏ ထုတ်ပြန်ချက်တွင် ရေးသားထားပြီး ထိုသို့ တိုက်ပွဲများ ဖြစ်ပွားခြင်းသည် SSPP/SSA မှ တစ်နိုင်ငံလုံး အပစ်အခတ် ရပ်စဲရေးကို လက်မှတ်မရေးထိုးနိုင်သေးခြင်းအပေါ် စစ်ရေးအရ ဖိအားပေးခြင်းသာဖြစ်ကြောင်း ထုတ်ပြန်ချက်တွင် ပါဝင်သည်။

အစိုးရနှင့် SSPP/SSA တို့သည် ၂၀၁၂ ခုနှစ် ဇန်န၀ါရီလက ပြည်နယ်အဆင့်၊ ပြည်ထောင်စုအဆင့် ငြိမ်းချမ်းရေးလက်မှတ် ရေးထိုးခဲ့ခြင်းဖြစ်ကြောင်း၊ လက်မှတ်ရေးထိုးပြီးနောက်ပိုင်း SSPP/SSA အနေဖြင့် တပ်မတော် တပ်စခန်းများအား ၀င်ရောက်တိုက်ခိုက်ခြင်း မရှိခဲ့ကြောင်း၊ သို့သော် တပ်မတော်နှင့် SSPP/SSA တို့အကြား တိုက်ပွဲပေါင်း ၃၀၀ ကျော် ဖြစ်ပွားခဲ့ပြီး တိုက်ပွဲများကြောင့် ရဟန်းရှင်လူ မိဘပြည်သူများ စစ်ဘေးဒဏ် ခံခဲ့ရပြီး အသက်အိုးအိမ်၊ စိုက်ပျိုးမြေများ၊ ကျွဲနွားတိရစ္ဆာန်များ ဆုံးရှုံးခဲ့ရကြောင်း SSPP/SSA ၏ ထုတ်ပြန်ချက်တွင် ဖော်ပြထားသည်။

ထိုသို့သော တိုက်ပွဲများသည် နိုင်ငံတော်အတွက် လည်းကောင်း၊ SSPP/SSA အတွက်သော် လည်းကောင်း၊ မည်သို့မျှ အကျိုးမဖြစ်ထွန်းဟု SSPP/SSA က သဘောထားထုတ်ပြန်ခဲ့သည်။

တစ်နိုင်ငံလုံး အပစ်ရပ်စဲရေး သဘောတူစာချုပ် လက်မှတ်ရေးထိုးပွဲကို ၂၀၁၅ ခုနှစ် အောက်တိုဘာ ၁၅ ရက်တွင် နေပြည်တော်၌ ကျင်းပမည်ဖြစ်ရာ SSPP/SSA အပါအ၀င် အစိုးရ အသိအမှတ် ပြုထားသည့် အဖွဲ့ခုနစ်ဖွဲ့မှ လတ်တလော ပါဝင်လက်မှတ်ထိုးနိုင်သေးခြင်း မရှိကြောင်း သိရသည်။

တစ်နိုင်ငံလုံး အပစ်အခတ် ရပ်စဲရေး သဘောတူစာချုပ်တွင် လက်မှတ်မထိုးသည့် အဖွဲ့များကို ထိုးစစ်ဆင်ပြီး တိုက်ခိုက်မည်ဆိုသော ရည်မှန်းချက်မျိုး အစိုးရတွင် မရှိဟု အစိုးရ၏ ပြည်ထောင်စုငြိမ်းချမ်းရေး ဖော်ဆောင်ရေး လုပ်ငန်းကော်မတီ (UPWC) ဒုတိယဥက္ကဋ္ဌ ပြည်ထောင်စုဝန်ကြီး ဦးအောင်မင်းက ပြီးခဲ့သည့် အောက်တိုဘာ ၄ ရက်တွင် ပြောဆိုထားသည်။

Credit To >>> Eleven Media Group

0 comments:

Post a Comment

Subscribe to: Post Comments (Atom)