ဆီးဂိမ်းပွဲတော်အတွက် ကူညီပံ့ပိုးပေးသူများ လိုဂိုနှင့်အမှတ်တံဆိပ်များ အသုံးပြုခွင့်ရမည်

(၂၇)ကြိမ်မြောက် ဆီးဂိမ်းပြိုင်ပွဲကျင်းပရန် တဖြည်းဖြည်းနီးကပ်လာပြီ။ အိမ်ရှင်မြန်မာတို့ဆီးဂိမ်းပွဲတော် အောင်မြင်စွာကျင်းပနိုင်ရေးအတွက် ဘက်ပေါင်းစုံမှ ကြိုးစားလျက်ရှိသည်။ ဆီးဂိမ်းပြိုင်ပွဲ၏ ဘဏ္ဍာငွေရှာဖွေရေးနှင့် ဆုချီးမြှင့်ရေးကော်မတီအနေဖြင့် ကူညီပံ့ပိုးပေးသူ (စပွန်ဆာ)များ လက်ခံလျက်ရှိသည်။

''ဆီးဂိမ်းပွဲတော် အောင်မြင်စွာကျင်းပနိုင်ရေးအတွက် ကူညီပံ့ပိုးပေးသူတွေကို ကျေးဇူးတင်ပါတယ်။ မြန်မာနိုင်ငံမှာ ၄၄ နှစ်ကြာမှ ပြန်လည်ကျင်းပခွင့်ရတဲ့ ကြုံတောင့်ကြုံခဲအခွင့်အရေးမှာ အခုလို ကူညီပံ့ပိုးပေးသူတွေ အားတက်သရော ရှိကြတာဟာ ဝမ်းသာစရာဖြစ်ပါတယ်။ (၂၇) ကြိမ်မြောက် ဆီးဂိမ်းပွဲတော် စာသားနဲ့ လိုဂိုတံဆိပ်တွေကို တရားဝင် အသုံးပြုခွင့်ရရှိကြမှာမို့ အခုလို ကူညီပံ့ပိုးပေးသူအဖြစ် သဘောတူ လက်မှတ်ရေးထိုးမှုဟာ မင်္ဂလာရှိတဲ့ ဆောင်ရွက်မှုတစ်ရပ်ဖြစ်ပါတယ်''ဟု ဘဏ္ဍာရေးဝန်ကြီးဌာန ဒုတိယဝန်ကြီး ဒေါက်တာမောင်မောင်သိမ်း က ရန်ကုန်မြို့ ပတ်ခ်ရွိုင်ရယ်ဟိုတယ်တွင် သြဂုတ် ၁၈ ရက်က ပြုလုပ်သည့် (၂၇)ကြိမ်မြောက် ဆီးဂိမ်းပွဲတော်အတွက် Dentsu Sports Asia+JK Consulant Co.,Ltd. & Daw Win (Garment Center) တို့၏ Sea Games Logo Official Main Sponsor နှစ်ဦးသဘောတူလက်မှတ် ရေးထိုးပွဲ၌ ပြောကြားသည်။

(၂၇)ကြိမ်မြောက် ဆီးဂိမ်းပွဲတော်အတွက် ကူညီပံ့ပိုးပေးသူများမှာ ယခုအခါ ၁ဝ ခုခန့် ရရှိနေပြီဖြစ်ပြီး ဆက်လက်၍လည်း လက်ခံပေးသွားမည်ဖြစ်သည်။ ကူညီပံ့ပိုးပေးသူ (စပွန်ဆာ)များကို ကန့်သတ်မှုမရှိဘဲ ဆောင်ရွက်ပေးသွားရန်ရှိပြီး နောက်ဆုံးသတ်မှတ်ချိန်မှာ နိုဝင်ဘာ အထိခန့်မှန်းထားကြောင်းသိရသည်။

(၂၇)ကြိမ်မြောက် ဆီးဂိမ်းပွဲတော် အောင်မြင်စွာကျင်းပနိုင်ရေးအတွက် ကူညီပံ့ပိုးပေးသူ (စပွန်ဆာ)များကိုလည်း ဆီးဂိမ်းပွဲတော်မကျင်းပမီ အခမ်းအနားပြုလုပ်ပြီး ဂုဏ်ပြုလက်မှတ်များ ပေးအပ်ရန်လည်း စီစဉ်ထားကြောင်း သိရသည်။

လာမည့် ဒီဇင်ဘာလတွင် ကျင်းပမည့်(၂၇) ကြိမ်မြောက်ဆီးဂိမ်း ပွဲတော်သည် အိမ်ရှင်မြန်မာတို့အတွက် ဂုဏ်ယူစရာကောင်းသော၊ ဧည့်ဝတ်ကျေပွန်တတ်သည့် မြန်မာတို့အကြောင်းကို နိုင်ငံတကာကသိရှိစေမည့် အခွင့်အရေးကောင်းတစ်ရပ်လည်း ဖြစ်သည်။ နောက်တစ်ကြိမ် အိမ်ရှင်အဖြစ်လက်ခံကျင်းပရန် ၂၂ နှစ်ကြာမျှ စောင့်မျှော်ရမည်ဖြစ်ရာ အောင်မြင်မှုများရရှိရန် ဝိုင်းဝန်းကြိုးစားလျက်ရှိနေပြီဖြစ်သည်။