ယခင်ကငွေချေးသူမရှိ၍ မြောက်ပိုင်းရှိနိုင်ငံကြီးထံမှ ငါးရာခိုင်နှုန်းအတိုးဖြင့်ချေးခဲ့ရဟု ဦးစိုးသိန်းကပြော
နေပြည်တော်- ပြည်ပနိုင်ငံများမှ ချေးငွေများရယူရာတွင် အတိုးနှုန်း အသက်သာ ဆုံးနိုင်ငံများကို သာ ရွေးချယ်ရယူမည်ဟု နိုင်ငံတော် သမ္မတရုံးဝန်ကြီးဌာန ပြည်ထောင်စုဝန်ကြီးဦးစိုးသိန်းက ဇွန် ၂၉ ရက် နေပြည်တော်သတင်းစာရှင်းလင်းပွဲတွင်ပြောကြားသည်။
“အရင်က မြောက်ပိုင်းနိုင်ငံကြီးက ချေးတာ အတိုးကငါးရာခိုင်နှုန်း(တစ်နှစ်အတိုးနှုန်း)ပေးရတယ်။
အခြားနိုင်ငံတွေက ချေးငွေယူမရတော့ သူ့ဆီကပဲယူခဲ့ရတယ်” ဟု ပြည်ထောင်စုဝန်ကြီးက ဆိုသည်။
အစိုးရသစ်လက်ထက်တွင် ပြည်ပချေးငွေများကိုရယူမည်ဆိုပါက လွှတ်တော်မှ အတည်ပြုချက် ရမှသာ ချေးငွေများရယူနိုင်သည်။
၂၀၁၃-၁၄ ဘဏ္ဍာနှစ်တွင် ဂျပန်နိုင်ငံမှ ချေးငွေယန်း ၅၁ ဘီလီယံကို ODA (နိုင်ငံတကာဖွံ့ဖြိုးရေး အကူအညီ)ချေးငွေအနေဖြင့် ရယူ ထားသည်။ ထိုချေးငွေအတွက် ဂျပန်နိုင်ငံကို တစ်နှစ်လျှင် အတိုး ၁ဒသမ ၁ ရာခိုင်နှုန်းသာ ပေးရသည်။ ယင်းချေးငွေမှာ ဆိုင်းငံ့ကာလ ၁၀ နှစ်၊ ပြန်ဆပ်ကာလ နှစ် ၃၀ သတ်မှတ်ထားသဖြင့် နှစ် ၄၀ အတွင်း ပြန်ဆပ်ရမည်ဖြစ်သဖြင့် နှစ်ရှည်ချေးငွေ အမျိုးအစားဖြစ်ကြောင်း စီးပွားရေး ပညာရှင်များကပြောသည်။
အဆိုပါ ချေးငွေမှာ တိုင်းပြည်ဖွံ့ဖြိုးတိုးတက်ရေးအတွက်ဖြစ်ပြီး အခြေခံအဆောက်အအုံများ တည်ဆောက်ရေးနှင့် ပြုပြင်ရေးလုပ်ငန်း များအတွက် ၁၇ ဘီလီယံ၊ သီလ၀ါ အထူးစီးပွားရေးဇုန်နှင့် ဆက်စပ်သော အဆောက်အအုံဖွံ့ဖြိုးတိုးတက်ရေးစီမံကိန်းအတွက် ဂျပန် ယမ် ၂၀ ဘီလီယံနှင့် ရန်ကုန်မြို့ရှိ လျှပ်စစ်ဓာတ်အားပေးစက်ရုံများနှင့် လျှပ်စစ်ဓာတ်အားလိုင်းများ ပြန်လည်ပြုပြင်တည်ဆောက်ခြင်းနှင့် အဆင့်မြှင့်တင်ခြင်းစီမံကိန်းအတွက် ဂျပန်ယမ်း ၁၄ ဒသမ ၀၅၂ ဘီလီယံတို့ဖြစ်သည်။
ကမ္ဘာဘဏ်မှ ချေးငွေဒေါ်လာ ၁၆၅ သန်းအတွက်လည်း မြန်မာနိုင်ငံအနေဖြင့် ၀န်ဆောင်ခစရိတ် ၀ ဒသမ ၇၅ ရာခိုင်နှုန်းကိုသာပေးရ မည်ဖြစ်သည်။ ယင်ချေးငွေမှာလည်း နှစ် ၄၀ သက်တမ်းဖြစ်ပြီး အခြေခံအဆောက်အအုံများအတွက် အဓိကဖြစ်ကြောင်း ကမ္ဘာဘဏ်၏ သတင်းထုတ်ပြန် ချက်တွင်ဖော်ပြထားသည်။
အစိုးရသစ်လက်ထက်တွင် အတိုးနည်းသည့် ချေးငွေများအပြင် နိုင်ငံတကာမှ ကူညီထောက်ပံ့သည့် အကူအညီများမှ အမေရိကန်ဒေါ် လာ ၆၇၇ သန်း၊ ဂျပန်ယမ်းငွေ ၃ ဒသမ ၅ဘီလီယံ၊ ယူရိုငွေ ၁၇ ဒသမ ၇ သန်း၊ သြစတြေးလျဒေါ်လာ ၁ ဒသမ ၃၄၇ သန်း၊ တရုတ်ယွမ်ငွေ ၂၅၀ သိန်းနှင့် နည်းပညာအကူအညီများဖြစ်သည့် အမေရိကန် ဒေါ်လာ ၄၀ ဒသမ ၃၄၅ သန်းနှင့် ဂျပန်ယမ်ငွေ ၂၃ ဒသမ ၈၃၅ သန်းရှိကြောင်း သတင်းရရှိသည်။
Myanmar Kyat Exchange Rate
0 comments:
Post a Comment