ကုန်းတွင်း ရေနံ လုပ်ကွက် ၁၈ ကွက် လုပ်ကိုင်ခွင့် ပဏာမ ရွေးချယ်

ကုန်းတွင်း ရေနံ လုပ်ကွက် ၁၈ ကွက် လုပ်ကိုင်ခွင့် ပဏာမ ရွေးချယ်ရာတွင် သြစတြေးလျ ကုမ္ပဏီများ အများဆုံး ပါဝင်ကြောင်း သတင်း ရရှိသည်။ လျှောက်ထားသော နိုင်ငံများ အနက် သြစတြေးလျ နိုင်ငံက စုစုပေါင်း ကုမ္ပဏီ ၁၂ ခုဖြင့် ပထမ အများဆုံးဖြစ်ပြီး အိန္ဒိယ၊ ဗြိတိန် နိုင်ငံတို့က ပဏာမ ရွေးချယ်သည့် စာရင်းတွင် အခြား နိုင်ငံများထက် အရေအတွက် ပိုများသည်။

တင်ဒါ ခေါ်ယူမှုကို မတ်လ ၁၆ ရက်က စာရင်း ပိတ်ခဲ့ပြီး နိုင်ငံတကာ ကုမ္ပဏီပေါင်း ၉၀ လျှောက်ထား ခဲ့ရာမှ ၅၉ ခုကို ပဏာမ ရွေးချယ်ခဲ့ကြောင်း၊ ၅၉ ခုအနက် နည်းပညာ မြင့်မားပြီး ငွေကြေး အင်အား တောင့်တင်းခြင်းနှင့် ပတ်ဝန်းကျင် ထိန်းသိမ်းရေး လိုက်နာသော ကုမ္ပဏီများကို ထပ်မံ ရွေးချယ်သွားမည်ဖြစ်ကြောင်း စွမ်းအင် ၀န်ကြီး ဌာနမှ တာဝန်ရှိသူ တစ်ဦးက ပြောသည်။

“ကုမ္ပဏီ တစ်ခုကို လုပ်ကွက် သုံးခု လျှောက်လို့ရတယ်။ လုပ်ကွက်က နည်းပြီး လျှောက်ထားတဲ့ ကုမ္ပဏီကများတော့ နောက်တစ်ကြိမ် ထပ် ရွေးဦးမယ်” ဟု အထက်ပါ ပုဂိုလ်က ပြောသည်။ ကုန်းတွင်း ရေနံနှင့် သဘာဝ ဓာတ်ငွေ့လုပ်ကွက် (၁၈) ကွက်တွင် သုံးကွက်မှာ ထုတ်ယူနေဆဲ လုပ်ကွက်ဖြစ်ပြီး ယင်းလုပ်ကွက် သုံးကွက်ကို လုပ်ကိုင်မည့် ကုမ္ပဏီနှင့် ချုပ်ဆိုရာတွင် ထုတ်လုပ်မှု တိုးမြှင့်သည့် ခွဲဝေရေး စာချုပ် ပုံစံဖြင့် ချုပ်ဆိုရမည် ဖြစ်ကြောင်း အထက်ပါ ပုဂ္ဂိုလ်က ပြောသည်။

“ရွေးချယ် ခံထားရတဲ့ ကုမ္ပဏီက မြန်မာ ကုမ္ပဏီတွေနဲ့ တွဲလုပ်ရမယ်။ တွဲရမယ့် ကုမ္ပဏီတွေကို သူတို့ ရွေးချယ်ခွင့် ရှိပါတယ်” ဟု စွမ်းအင် ၀န်ကြီးဌာန၊ မြန်မာ ရေနံနှင့် သဘာဝ ဓာတ်ငွေ့လုပ်ငန်း တာဝန်ရှိသူ တစ်ဦးက ပြောသည်။

ကုန်းတွင်း ရေနံလုပ်ကွက် (၁၈) ကွက်အနက်မှ ပြည်တောင်တန်း၊ မြန်အောင်၊ ရွှေပြည်သာ လုပ်ကွက်များသည် အဟောင်းများဖြစ်ပြီး ကျန် (၁၅) လုပ်ကွက်သည် အသစ်ဖြစ်ကာ ရေနံနှင့် သဘာဝ ဓာတ်ငွေ့ထွက်ရှိမည့် လုပ်ကွက်များကို မကွေး တိုင်းဒေသကြီး၊ ဧရာဝတီ တိုင်းဒေသကြီး၊ ရခိုင်ပြည်နယ်၊ မန္တလေး တိုင်းဒေသကြီး၊ စစ်ကိုင်း တိုင်းဒေသကြီးတို့တွင် စမ်းသပ် ရှာဖွေရမည် ဖြစ်သည်။