စည်ပင်မြေပေါ်မှ ဈေးဆိုင်ခန်းများကို မြဟံသာရုပ်ရှင်ရုံပိုင်မှ ဖယ်ရှားခိုင်း

သန်လျင်မြို့၊ တောင်ပိုင်းခရိုင်၊ဗိုလ်ချုပ်နေ၀င်းလမ်း၊ မြဟံသာရုပ်ရှင်ရုံအနီး စည်ပင်မြေပေါ်မှ ဈေးဆိုင်ခန်း များဖယ်ရှားပေးနိုင်ရန် မြဟံသာရုပ်ရှင်ရုံပိုင်ရှင် မန်နေဂျာက ဌာနဆိုင်ရာသို့ စာတင်ခဲ့သဖြင့် စည်ပင်မြေ တွင် ဈေးရောင်းချနေသော ဈေးဆိုင်ပိုင်ရှင် ကိုမြတ်သူ က “ ဆိုင်ခန်းက စည်ပင်နယ်နမိတ် ဆိုတော့ စည်ပင်ကိုအခွန်ပေးပြီးဈေးရောင်းလာတာ (၅)နှစ်ခန့် ရှိပါပြီ။ ရုပ်ရှင်ရုံပိုင်ကိုလည်း အခွန်လစာအမြတ် တစ်လ နှစ်သောင်း ပေးထားပါတယ်။ အခုမှဖယ်ခိုင်းနေတဲ့အတွက် ကျွန်တော်တို့ လမ်းဘေးဈေးသည်တွေ ဘယ်မှာ သွားရောင်းရမှာလဲ ” ဟု ပြောကြားခဲ့သည်။

          ရုပ်ရှင်ရုံပိုင်နှင့် ဆက်သွယ်မေးမြန်းကြည့်ရာ ဦးကျော်မြလှိုင်က မြဟံသာရုပ်ရှင်ရုံအား အဆင့်မြင့် ရုပ်ရှင်ရုံအဖြစ် မြဟံသာ(၂)ရုပ်ရှင်ရုံတစ်ရုံကို ဆောက်လုပ်နေသဖြင့်မကြာမီကာလတွင် ဖွင့်လှစ်မည်ဖြစ်ပြီး ဖွင့်ပွဲအခမ်းအနားသို့ ပြန်ကြားရေးဝန်ကြီးဌာန ပြည်ထောင်စုဝန်ကြီးနှင့် တိုင်းဒေသကြီးအစိုးရအဖွဲ့ ၀န်ကြီး များတက်ရောက်၍ ဖွင့်ပွဲအခမ်းအနားပြုလုပ်မည့် ရုပ်ရှင်ရုံရှေ့ မြို့နယ်စည်ပင်သာယာရေး ပိုင် မြေနေရာတွင် ဆောက်လုပ်ထားသော နားခိုဆောင်၊ ဗီဒီယိုအခွေဆိုင်နှင့် ကွမ်းယာဆိုင်များကို ဖယ်ရှားမှသာ မြေနေရာရှင်းလင်းပြီး မြို့နယ်စည်ပင်သာယာရေးအဖွဲ့ လိုလားချက်ပါအတိုင်း   ရေမြောင်းတူးဖော်ခြင်း၊ ကွန်ကရစ်ခင်းခြင်းလုပ်ငန်းများကို ဆောင်ရွက်ရမည်ဖြစ်၍ ဖယ်ရှားပေးနိုင်ရန် ဌာနဆိုင်ရာသို့ (၂၇.၃.၂၀၁၄) ရက်နေ့က စာတင်ထားကြောင်း ပြောခဲ့သည်။

    အခွေဆိုင်ပိုင်ရှင် ကိုမြတ်သူက “မိသားစု(၅)ယောက်ကို လုပ်ကိုင်ကျွေးမွေးနေရတဲ့အတွက် ဈေးမရောင်း ရရင်အခက်ခဲရှိပါတယ်။ဒီနေရာမှာမရောင်းရရင်ဘယ်နေရာမှာရောင်းရတော့မှာလဲ။ ရောင်းစရာနေရာမရှိတဲ့ အတွက် တင်ပြရခြင်းဖြစ်ပါတယ်” ဟုပြောကြားခဲ့သည်။

          စည်ပင်သာယာမှ တာဝန်ရှိသူ ဦးကြည်စိုး၊ ရုပ်ရှင်ရုံပိုင် ဦးကျော်မြလှိုင်နှင့် ဆိုင်ရောင်းသူ ကိုမြတ်သူတို့ (၃)ဦး တွေ့ဆုံဆွေးနွေးခဲ့သည်ဟု ကိုမြတ်သူက ပြောကြားခဲ့သည်။

    နှင်းဆီ

၂၃.၄.၂၀၁၅