အေးစက်နေသည့် အိမ်ခြံမြေဈေးကွက် နှစ်သစ်တွင် ပြန်လည်ဦးမော့လာမည်ဟု မှန်း

လာမည့်နှစ်ဆန်းပိုင်းကာလတွင် အိမ်ခြံမြေလုပ်ငန်းများ၏ အရောင်းအ၀ယ်အလားအလာ ပြန်လည် ကောင်းမွန်လာနိုင်သည်ဟု အိမ်ခြံမြေလုပ်ငန်းရှင်များက သုံးသပ်သည်။
အိမ်ခြံမြေဈေးကွက်သည် တစ်ပေပတ်လည် မြေဈေးနှုန်းသတ်မှတ်ချက် မထွက်မီတစ်လခန့်ဝန်းကျင်မှ ယခုချိန်ထိ ဈေးကွက်အေးနေခဲ့သော်လည်း မြန်မာနိုင်ငံတွင် ငွေပို၊ ငွေလျှံရှိသူများအတွက် ရင်းနှီး မြှုပ်နှံနိုင်ရန် အခြားနေရာမရှိသည့်အတွက် အိမ်ခြံမြေအရောင်းအ၀ယ် အပေါ်တွင်သာ ပြန်လည်ရင်းနှီး လာနိုင်ခြင်းဖြစ်သည်ဟု ယင်းတို့က သုံးသပ်ခြင်းဖြစ်သည်။

စိုးစံ(လင်း) အိမ်ခြံမြေ၀န်ဆောင်မှုကုမ္ပဏီ၏ မန်နေဂျင်းဒါရိုက်တာ ဦးအောင်ထွန်းက “နိုင်ငံတကာမှာလို စတော့ရှယ်ယာဈေးကွက်တို့ရှိလာဖို့က နှစ်နှစ်လောက်လိုသေးတော့ ဒီမှာက ငွေပိုရှိတယ်ဆိုရင် အိမ်ခြံ မြေအပေါ်မှာပဲ ရင်းနှီးမြှုပ်နှံဖို့ရှိတယ်၊ ကျွန်တော်တို့အားလုံးက လာမည့်နှစ်ဆန်း နှစ်လအတွင်းလောက် ဆို လုပ်ငန်းတွေ ပြန်လည်ကောင်းမွန်လာမယ်မှန်းထားကြတယ်” ဟု ပြောသည်။

မြန်မာနိုင်ငံရှိ အိမ်ခြံမြေများအား ၀ယ်ယူရင်းနှီးထားခြင်းသည် အမြတ်များများရရှိရန်သေချာသည့် တစ်ခု တည်းသောလုပ်ငန်းမျိုးဖြစ်နေပြီး လာမည့်နှစ်နှစ်ခန့်အတွင်း ရင်းနှီးမြှုပ်နှံရန်အကောင်းဆုံးဈေးကွက်ဖြစ် သည့်အတွက် အရောင်းအ၀ယ် ပြန်လည်ကောင်းမွန်လာမည်ဖြစ်သည်ဟု အိမ်ခြံမြေလုပ်ငန်းအသိုင်းအ ၀ိုင်းက ပြောသည်။

ယခင်က မော်တော်ကား ၊ ဒေါ်လာ ဈေးကွက်များအပေါ်တွင် ၀ယ်ရောင်း ရင်းနှီးမြှုပ်နှံခြင်းများရှိခဲ့သော် လည်း လက်ရှိတွင် ယင်းလုပ်ငန်းများမှာ မူဝါဒအပြောင်းအလဲများကြောင့် ရင်းနှီးမြှုပ်နှံမှုမရှိတော့ဘဲ Limited ဖြစ်နေသည့် အိမ်ခြံမြေလုပ်ငန်းသာကျန်ရှိတော့သည်။

စိုင်းခွန်နောင် အိမ်ခြံမြေနှင့် ဆောက်လုပ်ရေးလုပ်ငန်းကုမ္ပဏီ၏ အထွေထွေမန်နေဂျာ ဦးရန်အောင်က “အရင်ကလိုမျိုး ဈေးကွက်မဖြစ်ရင်တောင်မှ အခုလိုအေးနေတဲ့ပုံစံကနေတော့ နောက်နှစ်ဆိုပြန်ပြီး အရောင်းအ၀ယ်သွက်လာနိုင်တယ်၊ ကျွန်တော်တို့ဆီမှာက ရင်းနှီးမြှုပ်နှံဖို့က တခြားမှမရှိဘဲ၊ အခုအေး တာကလည်း ၀ယ်ရောင်းသမားတွေက တစ်ပေပတ်လည်ထွက်ပြီး ဘာဖြစ်မလဲဆိုပြီး စောင့်ကြည့်နေ တာလဲပါတယ်” ဟု ပြောသည်။

၂၀၁၃ နှစ်ဆန်းပိုင်းဝန်းကျင်မှ စတင်ကာ မြေ၀ယ်ရောင်းသူ အများစုသည် မြေ၀ယ်ယူပြီးလျှင် နောက် ထပ်တစ်ကွက်ဝယ်ခြင်းထက် မြေကွက်၏နေရာအချက်အချာကောင်းမွန်သည်ဆိုလျှင် ယင်းမြေကွက်တွင် ကွန်ဒို၊ တိုက်ခန်း တည်ဆောက်ပြီး ငွေရင်းနှီးမြှုပ်နှံမှုများရှိနေသည့်အတွက် နောက်ထပ် မြေကွက် များ ၀ယ်နိုင်ခြင်းမရှိတော့သည့် အချက်မှာလည်း ဈေးကွက်အေးသွားခြင်း၏ တစ်စိတ်တစ်ပိုင်းဖြစ်သည် ဟု အိမ်ခြံမြေ၀ယ်ရောင်းလုပ်သူတစ်ဦးက သုံးသပ်သည်။

Estate Myanmar အိမ်ခြံမြေလုပ်ငန်း၏ မန်နေဂျင်းဒါရိုက်တာ ဦးဟိန်းမိုးမြင့်လွင်က “ဈေးကွက်က အရောင်းအ၀ယ်ပါးပြီး အေးတော့ အစိုးရကလဲ အခွန်မရဘူး၊ ဒီလိုမျိုး အကျိုးမရှိတော့ မူဝါဒအပြောင်း အလဲဖြစ်မလားဆိုပြီး ဈေးကွက်သမားတွေက မျှော်လင့်နေကြတယ်” ဟု ပြောသည်။

အိမ်ခြံမြေ အရောင်းအ၀ယ်ပြုရာတွင် အခွန်ဆောင်ရမည့် တစ်ပေပတ်လည် မြေဈေးနှုန်းသတ်မှတ်ချက် များကို အိမ်ခြံမြေကာလတန်ဖိုးစိစစ်သတ်မှတ်ရေးအဖွဲ့က သတ်မှတ်ပေးပြီး အောက်တိုဘာ ၁ ရက်တွင် စတင်အသက်ဝင်ခဲ့သည်။

Mizzima