ရန်ကုန်၊ မေ ၂၇၊ ၂၀၁၃
မြန်မာနိုင်ငံတွင် ပြုပြောင်းလဲရေးလုပ်နေပါသည်ဟုဆိုသော်လည်း ပြည်သူများအတွက် အပြောင်းအလဲ အလွန်နည်းပါးနေကြောင်း အမျိုးသားဒီမိုကရေစီအဖွဲ့ချုပ် ဥက္ကဋ္ဌဒေါ်အောင်ဆန်းစုကြည် က ပြောဆိုလိုက်သည်။
ယနေ့မနက် ရန်ကုန်မြို့၊ တော်ဝင်နှင်းဆီခန်းမတွင် ကျင်းပပြုလုပ်သော အမျိုးသားဒီမိုကရေစီအဖွဲ့ချုပ်၏ ပထမဆုံးသော ဗဟိုကော်မတီဝင်အစည်းအဝေးတွင် ဒေါ်အောင်ဆန်းစုကြည်က ထိုသို့ ပြောဆိုလိုက်ခြင်း ဖြစ်သည်။
မြန်မာနိုင်ငံတွင် ပြုပြင်ပြောင်းလဲရေးဟု ပြောဆိုနေသည်မှာ ၃ နှစ်ခန့်ရှိလာပြီဖြစ်ကြောင်း၊ ပြုပြင်ပြောင်းလဲရေး အောင်မြင်နိုင်ရင် ပြုပြင်ပြောင်းလဲရေးလုပ်ဆောင်နေပါသည်ဆိုသော သူများအားလုံးကိုယ်တိုင် မိမိကိုယ်ကိုယ်ကိုယ်ပြုပြင်ပြောင်းလဲရန်လိုအပ်ကြောင်း၊ ပြုပြင်ပြောင်းလဲရေးလုပ်ငန်းစဉ်များသည် အပြောနှင့် မပြီးနိုင်ကြောင်း၊ ၃ နှစ်အတွင်း ပြုပြင်ပြောင်းလဲရေး လုပ်ဆောင်နေသည်ဟုဆိုသော်လည်း ပြည်သူလူထု၏ဘ၀ တိုးတက်မှု အလွန်နည်းပါးကြောင်း၊ ပြည်သူလူထုဘ၀တိုးတက်မှသာလျှင် ထိရောက်သော ပြုပြင်ပြောင်းလဲရေး ဟုဆိုနိုင်ကြောင်း ဒေါ်အောင်ဆန်းစုကြည်က ဆိုသည်။
"ကျမတို့နိုင်ငံက ပြုပြင်ပြောင်းလဲရေးလမ်းစဉ်သွားနေတယ်လို့ ပြောပါတယ်။ ဒါပေမယ့် ဒီလိုပြုပြင်ပြောင်းလဲရေး လမ်းစဉ် တကယ်သွားဖို့ဆိုတာက ပြုပြင်ပြောင်းလဲရေးလမ်းစဉ်မှာ ပါဝင်နေတဲ့သူအားလုံးက ကိုယ့်ကိုယ်ကိုယ် ပြုပြင်ပြောင်း လဲနိုင်မှ အောင်မြင်နိုင် မှာပါ။ ပြုပြင်ပြောင်းလဲရေးဆိုတာ အပြောနဲ့ တင်မပြီးပါဘူး။ အခုဆိုလို့ရှိရင် ပြုပြင်ပြောင်းလဲရေးလို့ ပြောခဲ့တာ ၃ နှစ်လောက်ရှိပါပြီ။ ၃ နှစ်အတွင်းမှာ ကျမတို့ ပြည်သူတွေအတွက် ဘယ်လောက် အပြောင်းအလဲရှိလဲဆိုတာ သေချာစဉ်းစားကြည့်ရင် စမ်းသပ်ကြည့်ရင် အင်မတန်မှ နည်းတယ်လို့ ပြောရမှာပါ။ တကယ်ပြုပြင်ပြောင်းလဲရေးထိရောက်ဖို့ဆိုရင် ထိရောက်တယ်လို့ ပြောနိုင်ဖို့ဆိုရင် ကျမတို့ ပြည်သူတွေ ဘ၀က တိုးတက်ရမှာပါ" ဟု ဒေါ်အောင်ဆန်းစုကြည်က ပြောသည်။
Myanmar Kyat Exchange Rate
0 comments:
Post a Comment