မုံရွာ-မန္တလေး အဝေးပြေး လမ်းမကြီးပေါ်ရှိ ပရစ်ကုန်းမြောက်ရွာ အနီး
လမ်းကွေ့ တွင် ဧပြီလ ၁၈ ရက်နေ့ ညနေ ၄ နာရီ အချိန်က လမ်းဘေးချ
ရပ်စောင့်နေသော ဆိုင်ကယ်ကို တစ်ဖက်ယာဉ်ကြောမှ လာသော မော်တော်ယာဉ်က
ဝင်တိုက်ရာမှ သားအဖ သုံးဦး ပွဲချင်းပြီး သေဆုံးသွားကြောင်း မျက်မြင်
တွေ့ရှိသူများက ပြောကြားသည်။
မုံရွာမြို့ ပိတောက်ကုန်း ရပ်ကွက်တွင် နေထိုင်သူ နာရီပြင်ဆရာ
ဦးစိုးထွန်း (၄၁) နှစ်သည် ရှစ်တန်းအောင်မြင်၍ ကိုးတန်းသို့ တက်ရောက်မည့် ၎င်း၏
သမီးအကြီးဖြစ်သူ မနှင်းထားထားခိုင် (၁၄) နှစ်ကို မုံရွေးကျေးရွာရှိ
ဘော်ဒါဆောင် တစ်ခုတွင် ကျောင်းအပ်ရန် အငယ်ဆုံး သားငယ် မောင်စည်သူထွန်း (၁၃)
နှစ်ကိုပါ တင်ဆောင်၍ ဆိုင်ကယ်ဖြင့် သွားရောက်စဉ် ပရစ်ကုန်း မြောက်ရွာအနီး
လမ်းကွေ့၌ တစ်ဖက်ယာဉ်ကြောမှ (မန္တလေးဘက်မှ) အရှိန်ဖြင့် မောင်းလာသည့် Ractis
အမျိုးအစား ခဲရောင် မော်တော်ကားကို တိမ်းရှောင်ရန် လမ်းဘေးချရပ်ပေးထား
သော်လည်း အဆိုပါကားက ဆိုင်ကယ်အား ဝင်တိုက်သွားရာ သားအဖသုံးဦးစလုံး
နေရာတွင်ပင် သေဆုံးခဲ့ကြောင်း မုံရွာမြို့ အမှတ် (၁) ရဲစခန်းမှ တာဝန်ရှိ
ရဲအရာရှိ တစ်ဦးက ပြောကြားသည်။
“ကျွန်တော်တို့က ဒီအနီးအနားက ဘုန်းကြီးကျောင်းထဲမှာ ပန်းရန်လုပ်နေတာ။
ဝုန်းဆိုတဲ့ အသံ အကျယ်ကြီးကြားတော့ ပြေးထွက်လာပြီး
ဘာဖြစ်တာလဲဆိုတာကြည့်တော့ ကားရော၊ လူတွေရော အောက်ထဲကျနေပြီ။ တိုက်ခံရတဲ့
သားအဖ သုံးယောက်က မလှုပ်တော့ဘူး၊ ကိုင်လဲ မကိုင်ရဲဘူး။
ဒီအတိုင်းကြည့်နေရတယ်” ဟု ယင်းဖြစ်စဉ်အနီး ရှိနေခဲ့သည့် ပန်းရန်လုပ်သား
ကိုကျော်ထူးက ၎င်းမြင်တွေ့ခဲ့ရသည် များအား ပြန်လည်ပြောပြသည်။
သေဆုံးခဲ့သည့် ကလေးငယ် နှစ်ဦး၏ မိခင်မှာလည်း လွန်ခဲ့သည့် ငါးလခန့်ကပင်
ကျောက်ကပ်ရောဂါဖြင့် သေဆုံးခဲ့ရပြီး ယခုယာဉ်တိုက်မှုကြောင့် ကျန်ရစ်ခဲ့သည့်
မိသားစုဝင်အားလုံးကို ဆုံးရှုံးလိုက်ရပြီ ဖြစ်ကြောင်း ဆွေမျိုးသားချင်း
များက ပြောကြားသည်။
အဆိုပါ ယာဉ်တိုက်မှုဖြစ်စဉ်နှင့် ပတ်သက်၍ မုံရွာမြို့ အမှတ် (၁) ရဲစခန်းက
ယာဉ်(ပ) ၄၀/၂၀၁၃၊ ပြစ်မှုပုဒ်မ ၃၀၄ (က) အရ အမှုဖွင့်၍
ဆောင်ရွက်လျက်ရှိကြောင်း ယင်းရဲစခန်းမှ တာဝန်ကျ ရဲအရာရှိ တစ်ဦးက
ပြောကြားသည်။
Myanmar Kyat Exchange Rate
0 comments:
Post a Comment