ထားဝယ်မြို့၌ အလုပ်ရှင်နှင့် အလုပ်သမား ပြဿနာ ဖြစ်ပွားရာတွင် ရဲတပ်ဖွဲ့ဝင်များ၏ ရိုက်နှက်မှုကြောင့် အလုပ်သမားတစ်ဦး ဒဏ်ရာအပြင်းအထန် ရရှိခဲ့၍ ဆေးကုသရန် ရန်ကုန်သို့ စင်းလုံးငှား လေယာဉ်ဖြင့် ပို့ဆောင်ခဲ့ရ

တနင်္သာရီတိုင်း ဒေသကြီး ထားဝယ်မြို့ ညောင်ရမ်းတောင်ရပ်ရှိ HY (ဟိုင်ယွမ်) အအေးခန်း စက်ရုံ၌ မတ် ၇ ရက် ည ၈ နာရီခွဲ အချိန်ခန့်က စက်ရုံပိုင်ရှင်နှင့် အလုပ်သမားများ အချေအတင် ဖြစ်ပွားခဲ့မှုအပေါ် ရဲတပ်ဖွဲ့ဝင်များက အလုပ်သမားနှစ်ဦးအား ဖမ်းဆီးရာတွင် ရိုက်နှက် ဖမ်းဆီးခဲ့သောကြောင့် အလုပ်သမားတစ်ဦး ဦးခေါင်းတွင် ပြင်းထန်စွာ ဒဏ်ရာရရှိခဲ့ပြီး ထားဝယ်ပြည်သူ့ ဆေးရုံသို့  အတွင်းလူနာအဖြစ် တင်ပို့ခဲ့ရကာ ဆေးကုသရန်အတွက်  မတ် ၈ ရက် ညနေပိုင်း၌ စင်းလုံးငှား လေယာဉ်ဖြင့် ရန်ကုန်မြို့သို့  ဆက်လက် တင်ပို့ခဲ့ရကြောင်း သိရသည်။


“ပြဿနာဖြစ်တဲ့နေ့ ည ၈ နာရီကျော်လောက်မှာ အလုပ်သမား တစ်ယောက်က အလုပ်ပြီးလို့ အရက်သောက်ပြီး စက်ရုံထဲ ၀င်လာတာကို စက်ရုံပိုင်ရှင်ဖြစ်တဲ့ တရုတ်လူမျိုးရဲရဲ (မစ္စတာဟွမ်)က မြင်ပြီး အလုပ်ကထုတ်တယ်။ အဲဒါကို မကျေနပ်လို့ သက်နောင် (အရိုက်ခံရသူ) က ၀င်ပြောတော့ စကား အချေအတင်ဖြစ်ပြီး စက်ရုံပိုင်ရှင်က အုပ်ချုပ်ရေးမှူးနဲ့ မီးသတ်တွေကို ခေါ်တယ်။ ည ၉ နာရီလောက်မှာ မြို့နယ်ရဲတပ်ဖွဲ့ မှူးနဲ့ အဖွဲ့ ရောက်လာပြီး အလုပ်သမားတွေကို မင်းတို့ အချိုးမပြေဘူး ပြောပြီးတော့ အလုပ်ရှင်ကို ခေါ်တယ်။ အလုပ်သမား ခေါင်းဆောင်၊ စက်ရုံ မန်နေဂျာနဲ့ သူဌေးလင်မယားကို ခေါ်ပြီး ရဲမှူး ရှေ့မှာ ညှိနှိုင်းဖြေရှင်းတယ်။ အလုပ်သမား ခေါင်းဆောင်ကို အလုပ်သမားတွေအတွက် တာဝန်ယူမလား မေးတော့ ခေါင်းဆောင်ကလည်း တာဝန်ယူတယ် ပြောတယ်။ အဲဒီလိုဖြေပြီး ပြေလည်တဲ့အချိန် ည ၁၁ နာရီ လောက်မှာ မြို့မရဲစခန်းက စခန်းမှူးနဲ့ အဖွဲ့တွေ ထပ်ရောက်လာပြီး သေနတ်တွေနဲ့ ရဲလေးယောက်က မောင်းတင်ပြီးတော့ အလုပ်သမားတွေကို ချိန်ထားတယ်။ ရဲအရာရှိ တစ်ယောက်က ၀င်လာတဲ့ သူကို ပစ်ဆိုပြီးပြောတယ်။ အဲဒီမှာ အလုပ်သမားတွေဘက်က ပြန်ပြီးပြောတော့ သက်နောင်နဲ့ အောင်ဖြိုးလင်းတို့ နှစ်ယောက်ကို မင်းတို့အချိုးမပြေဘူးဆိုပြီး ထွက်လာခိုင်းတယ်။ သက်နောင်က ထရပ်လိုက်ပြီး ရဲ ၁၀ ယောက်လောက်က သူ့ကိုဆွဲတဲ့ အချိန်မှာ သူကလည်း ရုန်းကန်တော့ ရဲတွေက ၀ိုင်းထိုးတယ်။ နံပါတ်တုတ်တွေနဲ့ ရိုက်ပြီး ရဲတစ်ယောက်က စက်ရုံထဲမှာ ရှိနေတဲ့ နှစ်လက်မ ပတ်လည်တုတ်နဲ့ ခေါင်းကို ရိုက်လိုက်တဲ့ အချိန်မှာ သက်နောင်လဲကျသွားတယ်။ အရိုက်ခံရတဲ့ သက်နောင်က  ဦးနှောက်မှာ သွေးယိုစီးပြီး အထဲမှာ သွေးခဲနေတော့ အခြေအနေက မဟန်ဘူးလို့ ဆရာဝန်က ပြောတယ်။ သက်နောင်ရဲ့ မိသားစုဝင်တွေက ရန်ကုန်ကို လေယာဉ်နဲ့တင်ဖို့ ပြောတော့ လမ်းမှာတစ်ခုခုဖြစ်ရင် အာမမခံနိုင်ဘူး၊ ထားဝယ်ဆေးရုံမှာ ခွဲရင်လည်း အသက်ရှင်ဖို့ အာမမခံဘူးလို့ ဆရာဝန်က ပြောတယ်” ဟု ဟိုင်ယွမ် အအေးခန်း စက်ရုံမှ အလုပ်သမားတစ်ဦးက ပြောကြားသည်။

ယင်းသို့ ဖြစ်ပွားပြီးနောက် ရဲစခန်းမှ သက်နောင်နှင့် အောင်ဖြိုးလင်းတို့ နှစ်ဦးအား ဖမ်းဆီးသွားပြီး သက်နောင်အား ထားဝယ်ပြည်သူ့ဆေးရုံသို့ တင်ပို့ပေးခဲ့ကာ အောင်ဖြိုးလင်းအား ထားဝယ်ရဲစခန်း၌ ဖမ်းဆီးထားကြောင်း၊ မတ် ၈ ရက် နံနက်ပိုင်းတွင် ထားဝယ်မြို့နယ်နှင့် ခရိုင်၊ တိုင်းရဲမှူး အဆင့်ဆင့်မှ ဆေးရုံသို့ ရောက်ရှိလာပြီး အရိုက်ခံရသည့် လူနာအား ရန်ကုန်သို့ တင်ပို့နိုင်ရန် အလုပ်ရှင်နှင့် ညှိနှိုင်းကာ မြန်မာအမျိုးသား လေကြောင်းပိုင် လေယာဉ်ငယ်အား အမေရိကန် ဒေါ်လာ ၅၄၀၀ ဖြင့် ငှားရမ်းပေးပြီး ညနေ ၅ နာရီခွဲတွင် ထားဝယ်ဆေးရုံမှ တစ်ဆင့် ရန်ကုန်သို့ တင်ပို့ပေးခဲ့ကြောင်း သိရသည်။

အဆိုပါ ကိစ္စနှင့် ပတ်သက်၍ တိုင်းဒေသကြီး ရဲတပ်ဖွဲ့မှူးရုံးအား သွားရောက်မေးမြန်းရာတွင် တိုင်းရဲတပ်ဖွဲ့ မှူးရုံးမှ ဦးစီးအရာရှိက “စက်ရုံက မူးနေတဲ့ လုပ်သားနှစ်ယောက်က မိန်းကလေး အဆောင်ဘက်ကို သွားလို့ ပိုင်ရှင်က ပြောရာကစပြီး ပြဿနာဖြစ်တယ်လို့ သတင်းရတယ်။ ပိုင်ရှင်က ရပ်ကွက်အုပ်ချုပ်ရေးမှူးကို ခေါ်ပြီးပြောတယ်။ ပြောမရလို့  နောက်ဆုံးရဲကို အကြောင်းကြားပြီး သွားရောက်ဖမ်းဆီးတာပဲ။ အဲဒီအချိန်မှာ ရုန်းရင်း ဆန်ခတ်ဖြစ်ပြီး အခုလို ဖြစ်သွားတာပါ။ ဦးနှောက်နဲ့ အာရုံကြောဌာနက ခွဲလည်း သိပ်အာမမခံဘူးလို့ ပြောတယ်။ ခရီးသည်လေယာဉ်နဲ့ တင်ဖို့ကျတော့ ခုံကလှဲချလို့ မရတာမို့ အခုလို စင်းလုံးငှား လေယာဉ်နဲ့ ရန်ကုန်ပို့ဖို့ စီစဉ်ပေးလိုက်တာပါ။ မနေ့ညက သွားဖမ်းတဲ့ ရဲတပ်ဖွဲ့ဝင်တွေကို စစ်ဆေးမယ်။ ပြစ်မှုထင်ရှားရင် ရဲစည်းကမ်း ဥပဒေအရ အရေးယူမယ်။ စစ်ဆေးပေါ်ပေါက်တဲ့အပေါ် မူတည်ပြီး လိုအပ်လို့ရှိရင် ပြင်ပပြစ်မှုဆိုင်ရာ ဥပဒေတည်ဆဲ ဥပဒေတွေအရလည်း အရေးယူဖို့ရှိတယ်” ဟု ပြန်လည် ဖြေကြားခဲ့သည်။

Credit To >>> Eleven Media Group